વ્યથા જીવન ની

ઘર સળગે  તો વીમો લેવાય
સપના સળગે તો શું કરવુ?

આભ વરસે તો છત્રી લેવાય
આંખો વરસે તો શું કરવુ?

સિંહ ગરજે તો ભાગી જવાય
અહંકાર ગરજે તો શું કરવુ?

કાંટો ખટકે તો કાઢી લેવાય
કોઇ વાત ખટકે તો શું કરવુ?

પીડા છલકે તો ગોળી લેવાય
વેદના છલકે તો શું કરવુ?

મારે તને મળવું છે

ફૂલ ઝરંતો હાથ લઈને, ઝાકળ જેવી જાત લઈને,
સૂરજની એક વાત લઈને મારે તમને મળવું છે !

સાંજ ઢળ્યા-ની ‘હાશ’ લઈને, ઝલમલતો અજવાસ લઈને,
કોરાં સપના સાત લઈને મારે તમને મળવું છે.

Gazal (ગઝલ)

કૈંક મજાના ગીતોમાં છું, ટહુકામાં છું,
બીજા શબ્દોમાં કહું તો બસ... જલસામાં છું.

ક્યારેક કલ્પના બહારનો આનંદ વરસે છે,
ત્યારે એવું લાગે છે કે સપનામાં છું.

એ દિવસથી મેં તો મારી ચિંતા છોડી,
જે દિવસથી જાણ્યું કે હું તારામાં છું.

મને મોકલ્યો‘તો તેં તારી દુનિયામાં પણ,
આજે તો હું કેવળ મારી દુનિયામાં છું.

ક્યારેક ઇશ્વર ફોન કરી પૂછે ક્યાં પહોંચ્યા?
હું કહું છું કે આવું છું, બસ... રસ્તામાં છું.